Einzelstück 6-S-1-01 - Streit wegen Verteilung der Steuerlast

Diese Archivalie unterliegt einer Archivsperre nach Tiroler Archivgesetz 2017 § 9 und/oder beinhaltet personenbezogene Daten, die dem Datenschutz unterworfen sind. Für nähere Informationen wenden Sie sich bitte an den/die zuständige/n ArchivarIn.

Signatur

AT GemA Flaurling ChrF-uk-6-S-1-01

Alternative Signatur

Titel

Streit wegen Verteilung der Steuerlast

Datum/Laufzeit

  • 1504-01-13 (Anlage)

Erschließungsstufe

Einzelstück

Umfang und Medium

Transkription - Quelle: Innsbruck TLA, Gemeindeschuber 1 Urkunde 6

Bestandsbildner/Urheber

Verwaltungsgeschichte

Bestandsgeschichte

Eingrenzung und Inhalt

Spruch wegen Streits über die Verteilung der Steuerlast 1504
Ich Hanns Diepperskircher Phleger zu Sneberg, Bekenn mit disem offen brief, Vnd thue kundt allermenigclich, Wo der furbracht oder gehort wirdet, Das sich Spann vnd Irrung gehalten haben, Zwischen Vlrichen Saurwein, vnd Wolfganngen Vnckner fur sich selbs vnd alls procurator Irer mitgewonten Nachpawrn, die Maÿrleut zu Flaurlingen, vnnd awerg ausgeschlossen, der Augustin Hilpranndt, Jorg Schneider, Hanns Schaffenrat, vnd Vrban Teÿndler, laut der procureÿ, besiglt mit Bernhart Gretzing, Richter vnd Ambtman zu Herrttenberg, Inn Sigl, der datumb stet Beschechen an Sunntag nach Sannd Cassians tag, alls man zalt, nach der gepurt Cristi Funftzehenhundert vnd in dem anndern Jar, an ainem Vnnd Cristan Schwinngenhamer, auch seßhaft zu Flaurling fur sich selbs, vnd alls procurator, Jorgen Kessler, Erharten Mullner Petern Floßman, Martin Grasl, Lenntz Weber Vnd Hannsen Gaugk, Gerhab Cristan Singers seligen Kinder, all Seeleut zu Flaurling, laut der procurey besiglt mit Erharten Stadlwisers, zu Tellffs Innsigl, der dann stet. Beschechen am sannd Tortelinstag, obgeschribner Jarzal, annders tails. Alls von wegen der Stewrn So zutzeÿten, da aufer sten wie die angelegt sullen werden, als dann die Selleut vermainten, ainstails beswärt sein. Vnnd aber die Maÿrleut vermainen das Sÿs nicht annderst halten gegen Inen, dann wie mit altar herkumen, vnd der brauch gewesen sÿ. Deshalben, die Kunigclich Maÿestat, auf mich ain Commission ausgen hat lassen lautend Inmaß wie hienach thuet volgen, Vnnserm getrewen heren Hannsen Dieperskircher, vnnserm Rat vnd phleger zu Sneeberg, Maximilian von gots gnaden Romischer Kunig etc., Getrewer lieber, Wir sennden dir hier Inn beslossen ein Suplicacion. So vnns Cristan Schwingenhamer furbracht hat die du vernemen wierdest, Vnd haben demnach dich der sachen, zu Commissaren angesehen, vnd furgenomen mit Ernnst Emphelhend das du dich des annemest vnd beladest, Vnverwondt leut zu dir nemest, die partheyen gegenainannder horest, vnd versuechest Sy gutlich miteinannder zuuerainen, mocht die aber nit gefangen werden Sy Rechtlichen Enntschaidest, des geben wir dir hiemit Vnnsern gewalt, Vnd duest daran vnser Ernnstliche Mainung, Geben zu Innsprugg am pfintztag nach sand Lionharts tag Anno domini Tv mo, Vnnsers Reichs Im Achtzehenden Jar, Commissio domini Regis in Consilio, Solicher kunigclicher Maÿestat nach hab Ich mich gehorsam bewisen, die partheÿen fur mich Erfrordert gemain Vnpartheysch leut, zu mir, mit der patheÿen Willen vnd zugebungen genomen, Sÿ gegen ainannder gehort, Vnd darauf mich mit meinen beÿsitzern vnnderredt vnd darauf zwischen Ir Erkannt vnd gesprochen wie hienach volgt. Dis nun hinfur In Ewig Zeÿt So steurn auf Ersten vnd angelegt sullen werden, Alsdann sullen aus der gemain, daselben zu Flaurlingen dartzu Nemen von den Maÿrleuten zwen verstendig nachpawrn Ainen von den minsten Mayrlweten Vnd den anndern von den merisch Vnd ainen von den Seelleuten nit den maistern vnd nit den mynstern vnd wo die, So darzue Erwelt werden, nit miteinannder, sich mugen verain, Sollen Sÿ den Richter anrueffen, das Er selbs dabeÿ sey, oder ainen anndern Vnuerwonten, an seiner stat, darzue schaff Vnd was dann durch den merern tail Erkannt wirdt dabey sol Es beleiben. Vnd sol angelegt werden, den Maÿrn vnd Seeleuten Ir ÿeden In sonnders nach seinen Vermugen vnd prauch nach dem der ain gemain newst vnd stuck Aigen, oder pawrecht, vnnder Im hat, Dann der schaden halb So Sÿ zu baiden tailen bisher genomen haben, Sol schaden gegen schaden ab, vnd kain tail dem anndern nicht schuldig zetuen sein. Sy sollen auch mit dem Commssari sich vertragen Wie Sÿ stat an Im Vinden, Vnd die so yeder tail her geworben hat sol Er selbs abferttigen, dem anndern aneschaden, das alles hab Ich den partheyen furgehalten, vnd gelaumart, Auf das vnd Sy mir mit sambt meinen beysitzern, auf ain stats den hanndl hintzulegen, vnd SÿZuuerain vnd darumbm gelobt haben. Darauf haben paid partheyen des Spruchs begert, In geschriben vnd besiglt zugeben, den Ichs gedachter Commissari also gib ÿedem tail ainen brief In gleichem laut Vnnder meinem Innsigl das Ich an den offen brief gehenngt hab, doch mir Vnd mein Erben one schaden, Beÿsitzer vnd mitsprecher der sachen sind gewesen Die Erbern Weÿsen Erhart Stadlwiser zu Telffs Niclaus Kirchmair auf dem Ranngken Stoffl Pamgarter zu Watens Vnd Caspar Gremlich zu Hätting Beschechen an Sambstag nach Erhardi Nach Cristi geburt Fünftzehenhundert vnd im Vierten Jare

Bewertung, Vernichtung und Terminierung

Zuwächse

Ordnung und Klassifikation

Benutzungsbedingungen

Reproduktionsbedingungen

In der Verzeichnungseinheit enthaltene Sprache

Schrift in den Unterlagen

Anmerk. zu Sprache und Schrift

Physische Beschaffenheit und technische Anforderungen

Findmittel

Hochgeladenes Findmittel

Existenz und Aufbewahrungsort von Originalen

Existenz und Aufbewahrungsort von Kopien

Verwandte Verzeichnungseinheiten

Verwandte Beschreibungen

Namen

Genres

Identifikator "Beschreibung"

Archivcode

Benutzte Regeln und/oder Konventionen

Status

Erschließungstiefe

Daten der Bestandsbildung, Überprüfung, Löschung/Kassierung

Quellen

digitales Objekt (Original) Bereich "Rechtsfragen"

digitales Objekt (Verweis) Bereich "Rechtsfragen"

digitales Objekt (Thumbnail) Bereich "Rechtsfragen"

Bereich Zugang

EAP

Verwandte Themen

Verwandte Personen und Organisationen

Verwandte Genres