Deel S2 - Weisthümer aus der Mitte des 16. Jhdts.

Mer Herr richter sind die nachpawrn ains worden Welher Nachpawr der ist der das Holtz schlecht Im Bannwaldt zu seiner notturft zu Zymmeren der ist das nit lenger darin lassen ligen dann zway Jar ließ er es aber daruber ligen so mag ain ander nachpawr welher der ist wol zufaren vnd das Holtz dann zu tryiben vnd ist darumb weder dem Gericht noch Richter vnd mänigklich nicht schuldig noch verfallen, Mer des geleichen, Welher Nachpawr, schlecht Im Vorholtz der sol das auch nicht lenger ligen lassen dann ain Jar es sy feuchts oder ander holtz wie es aber lenger ligt dan ain Jar so mag aber ain ander nachpawr wer der ist zufarn vnd das hinfuern vnd ist der auch nicht Endgelten Am Gericht vnd von mänigklich, Mer Herr Richter welher Nachpawr ain follen außwurff Der mag den wol an der Handt fuern Im Lechenfelt ab vnd ab als Verr Recht grouchet, Mer Herr Richter offen wir das durch Scharug Hoffer Velt ain steyg gen soll Sumer Vnd Winter Welher nachperman holtz get vmb ain Latten oder ander Holtz der sol das nach Sandt Jörgen tag bys auf Sandt Michelstag durch die Straß vnd nit durch das Veld ziechen Welher das Vberfuer der wär zway phund perner verfallen halbs dem Richter halbs den Nachpawrn Vnd ob icht vergessen vnd hie nit geschriben Wär In den brieff als vor gelesen ist. Mer Herr Richter offen wir das kain Nachpawr an dem obernperg vnd In der Veltleytten kain lawb holtz nicht sol verkauffen an das Wasser Sunder den Virarn anzaigen wo er abweg wolt ziechen Das fueder bey der stat Vmb zwen Kreutzer Vnd bey dem Haws vmb drey Kreuter Vnd die Klafter vmb sechs Kreutzer welher das vberfuer die pues halbs dem Richter halbs den Nachpawrn, Mer Herr Richter offen Wir das am Vndern perg gennedt die feldtloitten kain Daxen sollen schlachen noch Zawnrantten verpotten ain Stam bey zway phundt perner halbs der Herschaft hallbs der nachperschaft, Mer Herr Richter offen wir Das In der Lent hinder des pfarers Käbasgartten Im poden hinein nach pis an den Vodern Schroffen weder Däxen noch klein Holtz nicht solt schlachen pey vmb damit der Kirchen vnd den nachpawrn von dem pach kain schadt widerfar Auch die Hinder lendt wer holtz auf dem Pach wil treyben das der nicht fur den Schroffen her vor Lenntten Sunder da hinden Vnd nicht Holtz vor Sandt Veitztag auf den Pach treyben ist verpotten bey zechen phundt perner, Mer ist verpotten alles Veuchtein Holtz Dem Rain ein nach pys auff des Rappoltz Kollstat Vnd auffwerts pys an die Birchpuedt vnd vmb vnd vmb bys an das gatterfelt nicht solt schlachen Sunder zu dem Pach Vnd zu archHoltz Vnd auf fden Inn vnd Haym ain stam bey zway phundt perner Halbs dem Richter halbs den Nachpawrn