Unità documentaria 4-S-1-01 - Streit wegen Archens am Inn - Innregulierung

Revers. Stritt der Ober- und Unterpattnauer mit den Flaurlingern und Pollingern wegen des Archens am Inn 1472
Kund vnd ze Wissen seÿ gethan Aller mänigklich Mit disem offen brief Wo der furbracht oder gehört Wirdet Das sich spänn vnd Irrung gehalten haben Zwischen der Nachpawrschaft zu flawrling vnd der von Polling an aine Auch gemainigklich der nachpawren der oberen vnd vnderen pettnawer als am anderen tail Von Wegen archens beÿ dem Waser vnd Inn daselben derselben Irrung halben ein Comnissiön Von meinen genadigen Herren außgangen Vnd auf die hie hernach geschribnen Erberen lewt lawttend ist Als die mit namen in desselben meines genädigen heren brief begriffen sind Als dann derselb sein genaden brief hie nach Volget Wir Sigmund von gotts genaden Hertzog ze östereich ze Steÿr ze Karenden Vnd ze Krain Graue zu tÿrol etc. Embieten Vnseren getrewen lieben Iörgen Raindarffer vnnserem hawskamrer Als obman Jobsen Alpershoffer pfleger auf Strasperg Oswalden Steger Wilhalmen ÿpphoffer Vnnseren purgeren hie zu Insprugk Hannsen Sigwein vnd Jacoben Hawsman vnseren purgeren zu Hall Hannsen oheim Maister bartholome Zimmerman Vnseren Dienneren Thoman metzen Richter zu Wiltein Clementen Wolfsegker Blasÿen Sawrwein Wolfgangen Kobburger von Lannß Steffan schmid von naterß Connrad Nageli von siltz Oswalden schneider von mieming vnd Iacoben von Augsambs als sprecher vnnser genad vnd alles guet Als sich dann ain Irrung haltet zwischen vnnseren getrewen, n, vnnseren lewten zu flawrlingen vnd pollingen an ainen vnd den vnderen vnd oberen petnaweren Am anderen tail von wegen archens, Vnd damit paide tail vorschaden verhuet Auch die sachen hingelegt werden da von Empfelchen wir ew das Ir ew darnach richtet da mit Ir auf sannd gallen abend zu nacht schierist kumend zu flawrling seÿet vnd des morgens all partheÿen fur ew eruodert Auch ob not sein würde ander vnuerbant lewt zu vodrist vnseren werchmaister von Hall den wir auch dahin auf den selben tag senden werden zu ew nemet Sÿ aigenlich gegen ein ander verhöret Auch desgeleichen die gelegenhait besichtet vnd dar nach versuechet mit allem vleÿß Sÿ guetlichen zu verainen möcht aber die ainigkait nit geuangen werden Du bemelter obman sÿ mit sambt Deinen beÿsitzeren Rechtlichen entschaidest des geben wir dir hiemit vnnseren gewalt vnd Ir tuet dar an vnser erenstliche maÿnung Geben zu Insprugk am sambstag nach sannd dionisien tag Anno Domini M Septuagesimosecundo d. d. in Consilio Vnd Also auf denselben bestimbten tag haben wir die egenenten all obman vnd sprecher Außgenomen der benante werchmaister von hall auch der Blasy sawrwein von getzens der darinn frewntschaft halben auß gelassen ist Auch der benante wolfgang Kobburger nicht da gewesen Sunder den erberen Hannsen sundt von vill an seiner stat dar zu gesendet des ich mich benenter obman benuegen hab lassen auch die partheÿen ein guet geuallen an Im gehabt, haben wir vnß nach laut meines genädigen Herren brief Willig und gehorsam beweist vnd fleÿssigklich zusamen gefuegt die partheÿen all fur vnß erfoedert vnd den allen zu gesprechen ob kain tail wagrung an mir benenten obman oder meinen beÿsitzeren het das zu melden Dar auf die partheÿen all antburt gaben Sÿ hieten ain guet wolgeuallen an vnß allen vnd westen kaine zuuerbageren Dar nach sÿ aigenlich gegen ein ander brieflich vnd müntlich gehört vnd vernomen auch die gelegenhait besicht vnd dar nach versuecht Sÿ guetlich mit ein ander zuverainen Nun aber die guetlichait nit mocht gefangen werden an kainen tail Nach dem bin ich benanter obman vnd meine mit sprecher weitter meines genädigen Herren schreiben vnd Commission nach kömen vnd gangen Nach dem vnd wir dann die gelegenhait aigenlich besicht Auch die partheÿen gegen ein ander haben gehört vnd vernomen, haben wir darauf das Recht gesprochen als dann derselb Rechtspruch hieinn aigenlich geschriben vnd begriffen ist. Item ersten ist zu Recht erkant vnd gesprochen Nach dem vnd ain brief fur vnß bracht vnd den gehört haben der dann auch ein Rechtspruch Innhalt vnd außweiset zwischen flawrlingeren vnd pettnaweren von archens wegen Der Datum ist als man hat getzelt Nach Cristi gepurd Tausend vierhundert vnd in dem Achtzechenden Jar am freÿtag in der osterwochen Dabeÿ Die von flawrlingen auch die petnawer vermainten gehalten werden vnd dar auß in kaine sachen nit gen, lassen wir denselben brief peÿ wirden beleÿben vnd vermainen auch nÿemand dar auß vnd da von zu treÿben nach dem vnd das auch der partheÿen aller begeren ist. Item als dann der Peter milawnner auch seine mithaber vermainten die von flawrlingen hietn weiter gearcht vnd mit dem xxxxxxxxxxxxxxxxxxxxxxxxxxxxxxxxxxxxxxxxxxxxxxxxx macht sullen haben dann sÿ pillich tun sollen vnd der selb brief Innhalt, da wider die von flawrling geredt haben vnd vermainten nit weiter gearcht haben dann sÿ pillich sullen auf das kain weitere webeÿsung fur kumen Ist als dann das recht haben wil das die von flawrling sölichs geweist sein hierube sprechen wir das dieselb arch beleÿben sol In aller maß wie die ÿetz stet vnd nicht langer nach hin ein gegen dem wasser gemacht werdn Nachlaut des selben benenten briefs, Auch weiter als in demselben brief ain andre archen hinter derselben voderen archen bestimbt ist, Sollten die von Flawrlingen derselben archen nachkomen vnd aber halten wie vor nach laut desselben Ires briefs Nun aber der milawnner mit sambt seinen mithaberen Sich hören ließ wie die wasser zu ende derselben archen Flawrlingen halben Durch Die aw hin ab gangen seÿ Da wider die von Flawrlingen redten das sölichs beÿ mannes gedencken nicht beschechen seÿ vnd wir doch on dem brief noch in kainen weg entlich kaines marchs vnterricht noch vnß auß getzaigt ist Dar auf wir aber vnseren Rechtspruch setzen vnd außsprechen das zu vntrist derselben archen als die besicht vnd beschawt ist Sollen aber dieselben von flawrlingen Nach holtz vnd nach wasen abhin archen mit streichenden werchen hintz auf das march als das ÿetz auß getzaichent ist, Vnd von demselben march mugen sÿ vnd sollen archen Streichende werch vber das grieß vnd giessen So ÿetz daselben ist hintz auf das Egck des klainen awleins so enhalb desselben giessen ligt vnd in auch ÿetz auß gezait ist Darnach aber von demselben egck Sollen vnd mugen sÿ so verr vnd Ir gehord trist vnd schuldig sein zu archen Aber archen nach holtz vnd nach wasen ab hin albeg mit streichenden werchen als dann lanndsgewonhait vnd Recht ist angeuarde, So das wasser aber nun auf der von pollingen grundt vnd poden ligt vnd beruert Sollen vnd mugen sÿ sich auch selbs versorgen mit streichenden werchen auch nach holtz vnd nach Wasen abhin hintz zu Iren hewsern Dar nach daselben beÿ Ire hewsern Sollen vnd mugen sÿ sich dieselben von pollingen versorgen wie sÿ des trawen vnd maÿnen zugemessen Nach Iren nutz vnd das sÿ auch Iren Lehenhern Ire gueter versorgen trewlich vnd vngeuarlich Dar nach ist aber weiter bekant als man Das wasser vnd archen Enhalb petnawer halben auch besicht vnd beschawt hat besunder am anfang den giessen den sÿ nennen den fugchs giessen derselb gieß auch in dem brief egemelt bestimbt ist das der sol vnverarcht beleÿben Daselben auch ain egck ainer archen stet dar ab man sich auch weschwärt hat ist erkant das der selb gieß noch hin fur nach laut Desselben briefe gehalten vnd nicht verarcht werde Auch dasselb egck der archen ÿetz zu mal auch also beleib ob sich aber begab das ain Wasser groß dieselbig archen vnd egck hin fuerte Sol es hinfur nit mer auf das wasser gericht werden Sunder nach mals von dem wasen vier werchschuech ein streichende arch gemacht werd auch nach holtz vnd wasen ab piß auf denselben giessen nach laut desselben briefs Als man dann oberhalben die archen gantz ausher besicht hat da dann das wasser auch groß schaden tuet vnd sich schwärlich da hin gelget hat Mag der milawnner auch dasselb versorgen mit streichenden werchen aber nach laut desselben briefs angeuarde Dann als sich die von flawrling oberhalben vnter der la an zwaÿen enden auch beschwärten wie das zu geuarlich gearcht sult sein Daselben aber der milawnner vnterrichtung geben vnd getzaigt hat denselben schaden wie das Wasser in die archen hin gefuert hab da mit es sölich schmid pogen gewunnen hab Sollen dieselben Egck ÿetz zu mal auch also beleiben ob aber das Wasser die auch hinfuerte Sollen hinfur auch daseben streichende werch gemacht werden Nach laut des offt genenten briefs auch angeuärde Auch ob mein genädiger Her kainerlaÿ väll oder pänn da hiet setzen wir seinen genaden beuor Dann der zerug halben so ÿetz auf den obman vnd sprecher so in der Commission begriffen sind gangen ist Sollen pollinger den Drittentail abtun Desgeleichen flawrlinger auch ain Drittentail vnd die Petnawer auch ain Drittentail Auch welcher tail des Rechtspruchs begert geschribens vnd besiglt dem selbn wil ich als obman mit sambt meinen beÿsitzeren In Viertzechen tagen geben vnd hin fur nicht mer schuldig sein zebedencken noch ze geben Des Rechtspruchs vnd aller vorberuerten sachen haben die Partheÿen all egenent Die Pollinger Flaurlinger vnd petnawer ÿeder tail ain brief In geleichem laut begert geschribens vnd besigelt Den Ichs obgenenter obman Jörg Raindarffer die Zeit meines Egenenten genädigen herrn hawßkamrer Mit sambt meinenn beÿsitzern vnd Rechtsprecheren So disen bemelten Rechtspruch mit sambt mir gethan haben Die auch oben In Dem brief Aigentlich benent sein Das nit noturft ist Ire namen hie nach mer zuschreiben Den benenten partheÿen also gib vnder meinen Insigel Das ich als obman vnd geschafter Commissari an Disen offen brief gehengt han Doch mir vnd meinen Erben an schaden Beÿ solichem Rechtspruch Sein die benenten meine mit sprecher gewesen vnd mer Erber lewt Beschechen Nach Cristi vnsers Herren gepurd Als man zalt Tawsend Vierhundert vnd In dem Zwaÿvndsibenzigisten Jaren Am Sambstag Nach Sand Gallen tag