Stuk 9-S-1-01 - Spruch Flaurling mit Sigmund Milauner gegen Hoysen Neuner

Zewissen seie allermenigklichen, Nach deme sich Irrtungen vnd Spenn gehalten haben zwischen der Ehrbaren etc. Ganntzer Gemainer Nachperschafften zu Flaurlingen, dergleichen Hanns Daumen ze Oberhofn im namen vnd als ainem Swalttigem verordentem Gerhaben Sigmundten Milauners in der Pettnaw als der Clagunden an Ainem vnd Matheisen Newnners zu Mößern. Anntwortter, Annderstaÿlls, Als von wegen Etlicher Hundert gewaimer Pirkhnier Raÿff, darzue etlichen Stamb forhin holtz. So er Newnner Iungstverschiner Zeit In Ir der von Flaurling, auch Irer mitgewenten Aignen angehörigen Perg vnd holtzbsuöch vndterhalb Platten In Iren Cherentzen alles vermig Irs furlegunden Spruchbrieffs geslagen, derhalb von seint wegen in Rechtliche Taglaisstung vnd vncosstung gewißen worden vnd was in dem allem beruert, Der selben Irrttungen vnd Spenn, Sain erweltte Partheyen zuverhueten merers vncosstungs vnd vnwillen der Inen darauss Entsteen hetten mugen denich den fursichtigen weisen Hanns Rotten der Zeit Richter zu herttenberg als Obman dar zue den hernachbenenten Ersamen Pyderleuten in mass wie her nach volgt, Verainigt vnd vertragen, dem ist also, Anfengkhlich Soll aller vnwillen der sich zwischen Ermelten Partheyen der obenangezaigten gslagnen Raiff vnd forhen wegen Erhöbt, Crafftlos, vnd hiemit in ewigs vergessen gestöllt sein. Zum anndern Soll der von Flaurling furlegunder Spruchbrieff vnder weilenden Vlrichen von Wyndöckh Auch Casparn von Völls, vnd Bartlmeen Kargen Innsiglen verferttigt, Bey seinen wurden beleiben, vnd furter desseben Innhalt nach globt vnd vol zogen werden. Also das an denen Ennden vnd Chorentzen, nymermer ausser der von Flaurling bewilligung vorgenannter Matheis Newnner. seine Erben oder Nachkhumennde Innhaber, weder Rayff noch annder holtz khaine Recht zeslahen haben sollen. Zum dritten Soll gedachter Matheis Newnner vmb sein verhanndlung Souerr die herschafft was zehaben vermainte Sich mit derselben verainigen vnnd vertragen, wie er stat an Ir haben mag, der Nachperschafften ze Flaurling vnnd Iren mitgewennten Onentgeltnuß. Zum vierten Ist erkhanndt, das mer genannter Matheis Newnner denen von Flaurling vnnd Sigmunden Milaunner yn vnnd fur frender sachen genomnen vnnd erlitnen schaden ausserthalb des heutigen Costungs Geben vnnd Anntworten soll Benenntlichen Zwelff guldin Reinisch gemainer Muntz vnnd Lanndtswerung. Was oder wieuil aber an heut beruerennden Hanndlung von gerichts Obrigkhait wegen mit Zerung vnnd Beleuigung hieruber Erganngen, das sollen die ermelten Partheyen gleichlichen mitainander Ausgeben, dergleichen yeder tayll fur sich selbst Auch seinen furmundt vnnd Beystend Abrechnen vnnd abfertigen ye ainen dem anndern Onenntgeltnuß. Als aber diser Spruch beden taylen Eröffennt vnd ermelt worden So haben den mit seinem Innhalt Hanns Schlierntzawer, Hanns schaffebrath auch Ies oberli yeder fur sich selbst vnnd volgundts im namen vnnd als verordennt Gwalthabern Irer mitgewonnten gemainer Nachperschafften zu Flaurling In Irer gagennburttigkhait vnnd beywesen Auch sambt Inen Hanns daumb als Gerhab Ann stat Sigmunden Milauners Ains, Vnnd mergenannter Matheis Newnner Annderstayls, Nach genomnem bedacht, frey willigklich anngenomen Vnnd vorgedachtem Hanns Rottn Richter zu Hörttenberg als Obman, mit wissen willen vnd Beywesen, des vesten Furnemen Joseph wuesten, Romischer Hungrischer vnd Bohaimischer Kunigkhlicher Mayestat etc. Gemainer Waldtmaister mit Mundt vnd Hanndt zehalten zugsagt glopt des die gwalthaber sambt Hanns daumen vmb Iren Phenning geschriben vnnd besiglt begert, der Inen auf seines Matheisn Newnners fleissiger Pette wegen mit yeht genannts Richters aignem hieranhangendem Innsigl, verfertigt vnd gegeben ist. Ime seinen erben vnd Innsigel onschaden, Bey diser hanndlung gewesen Auch vmb die Besiglung gezeugen sein. Die Erbarn vnnd beschaidnen, Caspar Zirffaß Wolffganng Mumenfeindt ze Ynntzing, Cristan fritz der eltter In Bolling aldrey Eruordert Gsworne, Hanns Treutz, thoman Holtzapfl ze zierle vnd Caspar mul Sattler zu Telffs beden Partheyen furmundt vnd Beystendt. Beschöhen an Erichtag Nach der heyligen Zwelffpoten Irer Taylunng Nach Cristi vnnsers lieben Herren Funffzehenhundert vnnd des Achtunddreissiggisten Jares