Pièce A_IX_1 - Verkaufbrief Hans Stöckl

Verkaufbrief. Hans Stöckl von Flaurling verkauft dem Abt Konrad mehrere Grundstücke. gegeb. am St. Martinstag. 1361.
1 Ich Hans der Stokklein von Flaurlingen vnd ich Anna sein Hausfraw v[er]iehen offenleich an disem Brief für uns vnd für all ünser
2 erben, vnd tuon chunt allen den die in sehent oder hörn lesen, daz wir mit gemainem rat, und mit willen vnd wort aller der
3 die da zu von recht gehörten, vnd durch unsers merors frümen willen, den ersamen gaistleichen H[er]ren abt Chuonrat von Stams
4 vnd allem seinem Convent vnd allen irn nachchomen, recht redleich vnd darnacheleich ze chauffen gebn haben diu urbar die h[er-]
5 nach benennet sint umb vierzehen March zalp[er]ner gůt vnd gäber meram[er] muns, die wir gar vnd gäntzleich enphangen haben
6 von in, vnd der wir üns rüffen gerw[er]t mit disem Brief von in. Dez ersten haben wir in geben ein iuch akkers daz gehaizzen ist daz
7 angervelt vnd ein halb iuch gehaizzen der widem akker, vnd ein halb iuch diu gehaizzen ist diu kurtz halb iuch diu allew gele-
8 gen sint vnd[er] dem dorff ze Flaurlingen, vnd einen ang[er] der gehaizzen ist der lochang[er], vnd ein stukk einez ang[er]s gelegen vnd[er]
9 dem Weg, diu baidiu gelegen sint zwischen Flaurlingen vnd Pollingen, vnd zuo/zwo Hofstet, auf der einin ein Haus stet gelegen
10 in dem dorff ze Flaurling[e]n. Disn vorgenanten gůtlin haben wir in geb[e]n für aignin frein, ledigin vnd unv[er]sprochnin guot, mit
11 allen den rechten vnd nützen die da zu gehörent besuchtz vnd unbesuchtz, erpawes vnd unerpawes vnd setzen sei der in nütz
12 vnd in gewer mit disem brief. Also daz si die vorgenante[n] guot mugen besetzen vnd entsetzen, v[er]chauffen vnd v[er]setzen, wenden vnd
13 cheren, vnd allen irn frümen da mit schaffen als mit anderm irem aigen guot, an allin Hinderung vnd irrung ünser vnd all[er] uns[er] erbn
14 wan wir üns v[er]zigen haben vnd auch verzihen mit disem brief aller ansprach vnd ving[er]zaigen die wir gehabt haben, oder imm[er] mer
15 gewinnen möchten gen den selben gůtlein. Wir v[er]haizzen auch den vorgenanten H[err]en rechtin gew[er]schafft dez vorbenanten chauffes vnd
16 der vorgenanten guot nach landez recht wa, vnd als oft si dez bedurfen für uns vnd für alle unser erben, vnd ob si der gew[er]schaft
17 chainen schaden nämen vor gaistleichem oder vor weltleichem rechten wie der genant wär, oder wie si den nämen vnd in welch[er]
18 weis, den v[er]haizzen wir in ab zelegen gar vnd gäntzleich ir einez worten dar umb ze geloben an andrin bewaerung, vnd sulen den
19 Schaden denn haben auf alle dem daz wir oder unser erben ietz haben oder noch gewinnen [etc] sei varentz oder ligentz. Vnd daz den
20 vorgenanten H[er]ren von Stams ditz also stät vnd unzeprochen beleib geben wir in disen brief v[er]sigelt mit meins vorgenante[r]
21 Hansen Stokklein aigem Insigl daz dar an hanget. Vnd ze ein[er] m[er]orn sicherheit vnd vestung? dez vorgenanten chauffez han ich
22 gebeten meinen Vettern Rügern Stokklein ze den Zeiten Richt[er] auf Hertenp[er]ch, der hat sein aigen Insigel dar an gehenchet im
23 selben an schaden, vnd daz Insigel ich vorgenantin Anna mich v[er]pind wan ich aigens Insigels nicht enhan stat ze behalten
24 allez daz vorgeschriben stet. Dez vorgenanten chauffes vnd täding sint gezeig Chunrat der karg von pfaffenhoven Christan
25 der Caupner, vnd walther der ob[er]mair vnd Hainreich der Snider, all von Flaurlingen, vnd ander erber leut genug die da
26 pei waren. Ditz ist gesch[e]chn da man zalt nach Christes geburt, driuzehen hvndert[er] Jar da nach in dem eins vnd sechzigisten
27 Jar an Sant Mateins tag.