Unità documentaria A-X_1 - Verkaufbrief Ullrich Koller

Verkaufbrief. Ulrich Koller und Adelheid seine Hausfrau verkaufen dem Abt Konrad ihr Baurecht auf dem Mittelhof zu Flaurling. gegeb. am St. Luzientag. 1358.
1 Ich Vlreich der Goler, vnd ich Alhait sein Hausfraw, veriehen vnu[er]schidenleich an disem offenn prief für vns vnd für
2 all vnser erben, vnd tǔnd chunt allen den die in lesen oder hören lesen, daz wir mit verdahtem můt vnd mit fründ
3 rat, reht vnd redleich v[er]chaufft haben den ersamen Gaistleichen H[er]ren, Abt Chůnrad, vnd allem Conuent dez Clost[er]s
4 ze Stams, vnd ïrn nahchomen, vns[er]w pawreht div wir gehabt haben auf ïrm Hof ze Flaurlingen der genant ist der
5 mitelhof vmb ain vnd zwainzich March güt[er] vnd gäber m[er]aner münz, die wïr gar vnd genzleich dar vmb von in en-
6 pfangen haben, vnd rüffen vns der gew[er]t an disem prief, für vns vnd vnser erben, vnd v[er]zeihen vns aller ansprach
7 die wir gehabt haben, oder imm[er]mer gewinnen möhten gen den genanten pawrehten, also, daz si da mit nu fürbas
8 gevaren mügen wi si wellen, an vnser vnd aller vnser erben hind[er]ung, vnd ïrrung, Wïr v[er]haizzen auch den vorge-
9 nanten H[er]rn für vns vnd vnser erben, der selben pawreht vnd dez chauffes der pawreht, ïr rehten gew[er]n ze sein, an
10 aller stat wa vnd als offt si dez bedürfent, vor Gaistleichem vnd vor weltleichem rehten, nach dez landes reht, vnd
11 ob si der gew[er]schafft chainen schaden nämen, wie si den nemen, vnd wie der genant wär, den süln wïr in ab tůn
12 genzleich vnd gar an allez verziehen, vnd an wid[er]red, ïrn worten dar vmb ze gelauben an älliv ändriv weredung
13 vnd süln hauptgůt vnd schaden haben auf allem dem daz wïr od[er] vnser erben haben, vnd imm[er] mer gewinnen. Wär
14 auch daz in vnserr oder vns[er]r erben gewalt ïmm[er] chain prief her nach fünden vörd, der in chain[er]lai weis wid[er] disen
15 chauff gesein möht, wellen wïr daz der chain crafft niht enhab. Daz aw[er] den vorgenanten H[er]ren diser chauff stät vnd
16 vnzeprochen beleib geben wïr in disen prief v[er]sigelt mit H[er]r Rüdg[er]s Stökleins hangenden Insigel, ze den zeiten
17 Riht[er]s auf H[er]tenperch, der daz dürch vns[er]r pett willen im selben an schaden dar an gehenchet hat, wan wïr aigen In-
18 sigel niht haben, dar vnder wïr vns paidiv v[er]pinten mit vnser trewen. Dez chauffes sint gezivg Chůnrad d[er] Charg
19 von pfaffenhouen, Hainrich vnd Chůnrad peid Stiker, Hans der wirt ze Stams, vnd vlli der Gastchnecht
20 vnd ander erber leut genüg die da bi waren. Der ist geben nach Christes gepürt drivzehen hund[er]t iar da nach
21 in dem aht vnd fünfzigisten Jar an Sant Lucien tag.